Mat 20 | BEF | STEP | Kokulumamofihi kapo'aya bo mone'mofihi sipi foya'a ni'ina suhi luto ni'ibe. Ya hu'ehigo ai mone etehi folugu'i heleko limito buto bai nagami lolo hilina nose'na foya'agu kifi'na li etalana pana'i noenele'mabe.

Matthew 20

Bai naga foyagu lili'na bo

1 Kokulumamofihi kapo'aya bo mone'mofihi sipi foya'a ni'ina suhi luto ni'ibe. Ya hu'ehigo ai mone etehi folugu'i heleko limito buto bai nagami lolo hilina nose'na foya'agu kifi'na li etalana pana'i noenele'mabe. 2 Ai enali luga'a lili'nalo pana'i hiti kaga lilete mone kina mone kina yatai lilana lili'nalo lilana'mu yabe lina kaga komopa'ani monetoga nemalabe. Ya luto lu epoloto ai bai naga'i nose'na foya'agu enoho lifigo bite lili'na lilune'mu nebabe. 3 To yege ti olopa nohago bo luga'a hepa'i folagaha'agu fa'mene fuli nehago ai bu enogo'ehina. 4 Ya huloto ai lu epi'ehina: Lenali bite foya'nigu lili'na lilenogo nani mina eto huto lepilube. 5 Ya ligo enali bi'ahana. To fuligaha belo kanalo hiti to utehi yege liyofo nohina kanalo hiti ana suhi hu'ehina yabe. 6 To yege limi falalube'mu nohigo tauniga nobinati bo luga'a ho tilete nehago bu enogo'ehina. Ya huloto ai ma luto lu epi'ehina: Hena hu'ehigo lenali yatai malo fa'mene ho tilete nehabe? Kana su halina'mu yabe. 7 Enali ka'alo nona'a lu emi'ahana: Bo moneuba lili'na melimigo fa'mene nohune li'ahana. Ya lago ai lu epi'ehina: Lenali hiti ka'muya abite bai naga'i foya'nigu lili'na lilo.

8 To sinihi gise'na nohigo ana foya afo'afu kaba bo'a kehe iloto ma luto lu emi'ehina: Kai lili'na nelina bona'i kehe ito mina epibo. Alihi e'ahana lili'nalo panatogati hapi fito mina epimo buto yata'a kohe tete ete lili'na li'ahanamagihi alihi epitogo su heno. 9 To enali yege limi falalube'mu nohigo ete lili'na li'ahana bona'i kohe tete ete mone kina mone kina li'ahana. 10 To kohe tete ete yata'a lili'na li'ahanamagi nehetilete lali efahi enohoto babu lito li nupa lite enekesa yigi'ahana. Ya hana moneko suhi hite mone kina mone kina li'ahana. 11 Enali ana mina'ani lilete enugufagu logo bigo gulu gulu foya afo'afihi ma lite ka emeki'ahana. 12 Ya'ma alihi e'ahana bona'i lili'na hupamone kanasi li'ahana mina'ani lali limi'ahata moneko legege suhi luto epi'ahane. Ya hu'ehina lali keta lili'na sipi yege lanalo logobi hiti hiti huto lagabu lili'na li'ohune. 13 Enali ya lite lago enali kagalo nona'a foya afo'afu ma luto enali folagaha'anigu mone nohina bomofihi lu emi'ehina: Nalaluo, nani kele'mo negi noto faga melu keto'ohube. Kaga lutofi mone kinalo lili'na lilabe lugo komopati monetoga yata'a melelete alihi lili'na li'ahabe. 14 Kai efahaka lito hepakaga bubo. Efahi kimi'ohuna suhi luto alihi ete lili'na li'ahana bona'i epilube'mu nohube. 15 To hena hu'ehibe? Ya'mana nani'ni efaha'niloti ana'ina mone li huto hilube lilunaba bati mehilina ni'ifi? Nani hetofa suhi nohu ketonamo ya'mana hapa'nimu luto nani'i kipakafa nonahafihe? Ya luto foyamofihi afo'afu lu'ehina fono ka yabe. 16 Ya luloto Yesu ma luto molo emito lu'ehina: Ya'mana suhi luto bona'i enali alihi alanamagi kohe talana'mu yabe, to bona'i enali kohe tete alanamagi enali alihi bilana'mu yabe.

Yesu fililinamofihi kaga'a loegi monegi yupahi lu'ehina

Mk 10:32-34; Lk 18:31-34

17 Yesu Yelusale hepatoga bilube'mu nohuto 12 aposolo naga'a hiti enele'moto bu'ehina. Enali kapo melete nebite Yesu sumi ka ma luto lu epi'ehina: 18 Lenali kehelilo. Lali Yelusale hepato yatai notune. To nani Kokulumaguti limi'ohuna Bo, enali nele'mete bite sipi mono bona'i to keya kaga lu enelepise bona'i enali enayanuga bilana'mu yabe. Enali ka foya li netete to ho fililune lite kaga lu hetofa hilana'mu yabe. 19 Ya hilete enali Lomu gamanilo nele'mete binogo enali kiya yokolo ka li netete to naga osatu nibi yigilete to malipu yafalo noho fililana'mu yabe. Ya hinogo loegi monegi yegegu aku'i ho tiluna'mu yabe.

Yemesiugo Yoniugo etali kaba bole minalu'ibe'mu li'aha'ina

Mk 10:35-45

20 Ya'mana yupahi Yemesinogo Yoninogo ito'atitifu, Sebetihi liha'auba ana pana'ale Yesutoga etele'moto oto melugu lipito minoloto mone'nalo loka halube'mu hu'ehina. 21 Ya nohigo Yesu ma luto loka ho'ehina: Henanaka'mu nokebesibe? Ya ligo ai Yesuhi ma luto lu emi'ehina: Ma pana'ni loemo neha'ina kai alihi gihiti bo lolo nohitogomo moneba kayahi lamaga'aga minenogo moneuba kayahi soga'aga minenogo hila'ibe lutoka kaga molobo lu'ehina. 22 Ya ligo Yesu ana a'i lu emi'ehina: Noloka nohata kaga hapa'a hena kaga nolufi luto keheli bati mehuse nolane. Nanitoga huto hilina ekesa nagami'i naluna legitana ni'inagi letaliba ana konugutiba nala'ina ni'ifihe? Ya ligo etali li'aha'ina: Le'ali nalu'ina'mu yabe. 23 Ya la'igo Yesu lu etimi'ehina: Ma'naka lite letali nani ya'ma nagami konuguti nala'ina'mu yabe. Ya hila'ina ninaya moneuba nayahi lamaga'aga minenogo moneuba nayahi soga'aga minenogo hila'inamofihi hapa'aya nani nasana'ni meni'ibe. Ya'mana kefa hisalo luga'a bona'magihina yabe luto, nani afo'nifu li loloba hu epolo'ehina yabe.

24 Enali nayahi luga luga su hago aposolo naga'magi ya'mana kaga kehelilete ana kogunale ka etemeki'ahana yabe. 25 Ya nehago Yesu kehe i nupa huloto ma luto lu epi'ehina: Lenali keheli'ahabe. Kibina bo mone'mofihi naga'a mone naga'magi enele'mo laba hilete enali kaba nehi epalabe. To enali sipi bomagi boana'magi labaga liyafa hite lemege'i malalabe tite amuya kaga lilata nehabe. 26 Ya'ma suhi lenali folagahatinigu memineno. Mone bo lenali folagahatiniguti sipi bo minalube lutomo ai lenali kele kele botini minoto lenehe'meno. 27 Mone bouba lenali'i kaba hu lepalalube lilinauba ai lenali koko kako panatini mineno. 28 Ya'ma Kokulumaguti limi'ehina Bo ai ana suhi huto nohibe. Bona'magi aito lili'na he'mete li etalabe luto meo'ehina yabe. Ai boana'magitoga lili'na li epoloto enehe'malube luto o'ehina. To ai boana'magi kumu luto gufa'a he'miloto asaga boana'i foipana'ani pa so epalalube luto o'ehina yabe.

Etubu pisi lu'ehina bo loemo Yesu etele'mo bati hu'ehina

Mk 10:46-52; Lk 18:35-43

29 Enali Yeliko hepa'i he'mite nebago babu boana'i enemege'i lifite bi'ahana. 30 Etubu pisi lina bo loemo kapo beleha'alo neha'inagati Yesu noabe lana'a kehelilete sipi kehe ilete ma lite li'aha'ina: Tebitihi Pana'ase. Kiginaga fi le'emibo. 31 Ya nela'igo babu boana'magi bohoya ka lite etubunepa ilete he'miliyo li'ahana. Enali ya lana etali mekehelise koyo koyo ite kehe napa ite li'aha'ina: Tebitihi Pana'ase. Kiginaga fi le'emibo. 32 Ya la'igo Yesu ho tiloto kehe i etimiloto ma luto etoloka ho'ehina: Nani hena hu letatalugo nela'ibe? 33 Ya ligo etali lu emi'aha'ina: Sipi Bo, kai le'ubuti'a li gili hu le'etalane luto nolu'ibe. 34 Ya la'igo Yesu keke'i sipi lu etotoloto yaha'a ana bomale'i etubulo meko nohigo ana'asilo mele'isi etubu'atiti i gili higo asaga'na bu gelete Yesuhi mege'i melete bi'aha'ina yabe.